நாட்டின் பல பிரதேசங்களில் இடியுடன் கூடிய மழை பெய்யும்; சில மாவட்டங்களுக்கு மண்சரிவு அபாய எச்சரிக்கை

Colombo (News 1st) நாட்டின் பல பிரதேசங்களில் இன்று(02) மாலை அல்லது இரவு வேளையில் இடியுடன் கூடிய மழை பெய்யுமென வளிமண்டலவியல் திணைக்களம் எதிர்வு கூறியுள்ளது.

மத்திய, சப்ரகமுவ, ஊவா, வடமத்திய மாகாணங்களின் சில இடங்களில் 100 மில்லிமீட்டர் மழைவீழ்ச்சி பதிவாகும் சாத்தியமுள்ளதாக வளிமண்டலவியல் திணைக்களம் தெரிவித்துள்ளது.

இடியுடன் கூடிய மழை பெய்யும் சந்தர்ப்பங்களில் காற்றின் வேகம் அதிகரித்து காணப்படும் என்பதுடன் மின்னல் தாக்கங்கள் குறித்து அவதானமாக செயற்படுமாறும் அறிவுறுத்தல் விடுக்கப்பட்டுள்ளது.

இதேவேளை, பதுளை, கண்டி, கேகாலை, மாத்தறை, இரத்தினபுரி ஆகிய 5 மாவட்டங்களுக்கு மண்சரிவு எச்சரிக்கை விடுக்கப்பட்டுள்ளது.

கேகாலை மாவட்டத்தின் கேகாலை, தெஹியோவிட்ட, மாவனெல்லை பிரதேச செயலகப்பிரிவுகளுக்கும் மாத்தறை மாவட்டத்தின் பஸ்கொட பிரதேச செயலகப் பிரிவுக்கும் மண்சரிவு அபாய எச்சரிக்கை விடுக்கப்பட்டுள்ளது.

இரத்தினபுரி மாவட்டத்தின் இரத்தினபுரி, குருவிட்ட, கஹவத்த  பிரதேச செயலகப் பிரிவுகளுக்கும், பதுளை மாவட்டத்தின் வெலிமடை, ஹல்துமுல்ல பிரதேச செயலகப் பிரிவுகளுக்கும் மண்சரிவு அபாய எச்சரிக்கை விடுக்கப்பட்டுள்ளது.

கண்டி மாவட்டத்தின் உடபலாத்த, யட்டிநுவர பிரதேச செயலகப் பிரிவுகளுக்கு மண்சரிவு அபாய எச்சரிக்கை விடுக்கப்பட்டுள்ளது.