ජනපති සහ ඉන්දීය අගමැති අතර පැවති දුරකථන සංවාදයේ ප්‍රතිඵලයක් ලෙස ඩීසල් 20,000mt සහ පෙට්‍රල් 18,000mt රැගත් නෞකාවක් හෙට (28) කොළඹ වරායට පැමිණීමට නියමිතයි

COLOMBO (News1st): ජනාධිපති අනුර කුමාර දිසානායක සහ ඉන්දීය අගමැති නරේන්ද්‍ර මෝදි අතර පසුගියදා සිදුවූ රාජ්‍ය තාන්ත්‍රික දුරකථන සාකච්ඡාවකින් පසුව, ලංකා IOC සමාගම වෙත ඉන්ධන නැවක් එවීමට ඉන්දීය තෙල් සමාගම (IOC) තීරණය කර තිබේ.

ඉන්ධන සැපයුම සම්බන්ධයෙන් පවතින ගැටලු විසඳා ගැනීම සඳහා ඉන්දියාව සහ ශ්‍රී ලංකාව අතර ඉහළ මට්ටමේ රාජ්‍ය තාන්ත්‍රික මැදිහත්වීම් සිදු වූ අතර, ඒ අනුව ඉන්දීය තෙල් සමාගමෙන් ලංකා IOC සමාගමට මෙම ඉන්ධන තොග ලැබීමට නියමිතයි.

රාජ්‍ය තාන්ත්‍රික මැදිහත්වීම්වල ප්‍රතිඵලයක් ලෙස, ලංකා IOC සමාගම විසින් කලින් අවලංගු කර තිබූ ඇණවුමක් ද නැවත සක්‍රීය කර තිබේ.

දැනටමත් ඉන්දීය තෙල් සමාගමට අයත් එක් නැවක් ශ්‍රී ලංකා මුහුදු සීමාවට පැමිණ ඇති අතර මෙට්‍රික් ටොන් 38,000ක ධාරිතාවයකින් යුත් මෙම නැවේ ඩීසල් මෙට්‍රික් ටොන් 20,000ක් සහ පෙට්‍රල් මෙට්‍රික් ටොන් 18,000ක් ඇතුළත් ය.