කෙහෙළිය රඹුක්වැල්ලට සහ රමිත් රඹුක්වැල්ලට ඇප...

COLOMBO (News 1st) -හිටපු අමාත්‍ය කෙහෙළිය රඹුක්වැල්ල මහතා සහ ඔහුගේ පුත් රමිත් රඹුක්වැල්ල මහතා ඇප මත මුදා හරින්නැයි කොළඹ ප්‍රධාන මහේස්ත්‍රාත් තනූජා ලක්මාලී මහත්මිය අද(03) නියෝග කළා ය.

ඇප නියම වූයේ රුපියල් මිලියනය බැගින් වූ ශරීර ඇප 03ක් සහ රුපියල් 50,000 බැගින් වූ මුදල් ඇප 03ක්  ලෙසයි.

සැකකරුවන්ට ඇප දෙමින් ඔවුන්ගේ විදෙස් ගමන් තහනම් කළ මහේස්ත්‍රාත්වරිය විදෙස් ගමන් බලපත්‍ර අධිකරණයට භාර දෙන ලෙස ද නියෝග කළා ය.

අධිකරණය නියෝගය කළේ, තුන් වැනි සැකකරු වන කෙහෙළිය රඹුක්වැල්ල මහතාගේ සම්බන්ධීකරණ ලේකම් නිශාන්ත බණ්ඩාර බස්නායක මහතා ද රුපියල් මිලියනය බැගින් වූ ශරීර ඇප 02ක් හා රුපියල් ලක්ෂයක මුදල් ඇපයක් මත මුදා හරින ලෙසය.

අල්ලස් කොමිසම විසින් ඔවුන් අත්අඩංගුවට ගැනුණේ "දූෂණය" නැමැති වරද සිදු කළේ යැයි සැකපිට පැමිණිලි තුනකට අදාළවයි.

කෙහෙළිය රඹුක්වැල්ල මහතා ජනමාධ්‍ය, සෞඛ්‍ය සහ පරිසර ඇමතිවරයා ලෙස කටයුතු කරමින් සිටියදී 2021/2023 කාලයේදී පුද්ගලික කාර්ය මණ්ඩලයට නාමිකව පමණක් පුද්ගලයින් 15 දෙනකු සේවයට බඳවාගෙන ඔවුන්ට ගෙවන ලද වැටුප් ,අතිකාල දීමනා තම පුද්ගලික වියදම් සහ දේශපාලන කටයුතු වලට යොදා ගැනීමෙන් රජයට රුපියල් ලක්ෂ 80කට අධික  මුදලක් පාඩු කළ බව කියන  සිද්ධියක්  සම්බන්ධයෙන්  මෙම නඩුව පවරා තිබේ.

නඩුව ඔක්තෝබර් 10 වැනිදා යළි කැඳවීමට ද නියෝග කෙරිණි.