මර්වින් සිල්වා ලබන 9 වැනිදා දක්වා රිමාන්ඩ්..

COLOMBO (News 1st) - හිටපු අමාත්‍ය මර්වින් සිල්වා මහතා, ලබන 9 වැනිදා දක්වා රක්ෂිත බන්ධනාගාරගත කර තිබේ.

ඒ, මහර මහේස්ත්‍රාත් කාංචනා එන් සිල්වා මහත්මිය හමුවේ ඊට අදාළ නඩුව අද කැඳවූ අවස්ථාවේදී ය.

සිද්ධිය සම්බන්ධයෙන් තවත් සැකකරුවන් තුන්දෙනෙකු පමණ අත්අඩංගුවට ගැනීමට සිටින බව, අපරාධ පරික්ෂණ දෙපාර්තමේන්තු නිලධාරීන් අධිකරණය හමුවේ පැවසුවේ ය.

ඔවුන් සොයා ගැනීමට නොහැකිවී ඇති බැවින් ඔවුන්ට අයත් දේපල තහනම් කරන්නැයි ද, අපරාධ පරික්ෂණ දෙපාර්තමේන්තු නිලධාරීන් අධිකරණයෙන් ඉල්ලීමක් කළේ ය.

මේ වන විට 82 වැනි වියෙහි පසුවන මර්වින් සිල්වා මහතාගේ සෞඛ්‍ය තත්ත්වය පහත වැටී ඇති බවට, මෙරට සුප්‍රිද්ධ විශේෂඥ වෛද්‍යවරයෙකු වාර්තාවක් දී ඇතැයි නීතිඥවරුන් අධිකරණයට පෙන්වා දුන්නේ ය.

එම වාර්තාව සළකා බැලූ මහේස්ත්‍රාත්වරිය සඳහන් කළේ, බන්ධනාගාර රෝහලෙන් ලබාදෙන ප්‍රතිකාර ප්‍රමාණවත් නොවන්නේ නම්, සුදුසු විශේෂඥ වෛද්‍යවරයෙකු වෙත ඔහු යොමු කිරීමට අවසර ලබාදෙන බවයි.