අමෙරිකාවේ සෙනෙට් සභිකයෙකුගෙන් පැය 25කට අධික දේශනයක්...

by Staff writer 02-04-2025 | 6:37 PM

COLOMBO (News 1st) - අමෙරිකාවේ සෙනෙට් සභිකයෙක් එරට දේශපාලන ඉතිහාසයේ දීර්ඝතම සෙනෙට් දේශනය සිදු කර තිබේ.

ඒ පැය 25යි විනාඩි 5ක කාලයක් ඉක්මවා යමිනි.

මෙම වාර්තාව පිහිටවූයේ ඩිමොක්‍රටික් පක්ෂයේ නිව්ජර්සි ප්‍රාන්තය නියෝජනය කරන කෝරී බුකර් විසිනි.

සිය දේශනය ආරම්භ කරමින් ඔහු සඳහන් කළේ, සෙනෙට් සභාවේ න්‍යාය පත්‍රයට ඇතුළත්ව ඇති ඩොනල්ඩ් ට්‍රම්ප් ජනාධිපතිවරයා ප්‍රමුඛ රිපබ්ලිකන් පක්ෂයේ කටයුතුවලට බාධා කිරීමේ අරමුණින් තමන් අඛණ්ඩව කථා කිරීමට උත්සහ දරන බවයි.

ඒ අනුව ඔහු කිසිදු විවේකයක් නොගෙන අඛණ්ඩව සෙනෙට් සභාවේ පීඨිකාවේ රැඳී සිටිමින් පැය 25ක කාලයක් සිය දේශනය සිදුකර ඇත.

අදාළ දේශනයට අමෙරිකාවේ වත්මන් දේශපාලන තත්ත්වය ඩොනල්ඩ් ට්‍රම්ප් සම්බන්ධ විවේචන පමණක් නොව ක්‍රීඩා තොරතුරු සහ කවිපවා ඇතුළත් වී තිබේ.

විවිධ ප්‍රශ්න ඉදිරිපත් කරමින් ඩිමොක්‍රටික් පක්ෂය නියෝජනය කරන අනෙක් සෙනෙට් සභිකයින්ද දේශනය පවත්වාගෙන යෑමට සහයෝගය පළ කළේ ය.

ඒ අනුව 1957 වසරේ 'සිවිල් අයිතිවාසිකම් පනත' සම්මත වීම වැළැක්වීමේ අරමුණින් සෙනෙට් සභික ස්ට්‍රෝම් තර්මන්ඩ් සිදුකළ පැය 24යි මිනිත්තු 18ක දේශනය අභිබවා යාමට අද(2) කෝරී බුකර් සමත් විය.