දේශබන්දු වහාම අත්අඩංගුවට ගන්න... - වැඩබලන පොලිස්පතිගෙන් සියලු පොලිස් ප්‍රධානීන්ට විශේෂ දැනුම් දීමක්

COLOMBO (News 1st) - ශ්‍රේෂ්ඨාධිකරණය විසින් තාවකාලිකව සේවය අත්හිටුවා ඇති පොලිස්පති දේශබන්දු තෙන්නකෝන් මහතා වහාම අත්අඩංගුවට ගැනීමට සියලු පොලිස් ස්ථානාධිපතිවරුන්, කොට්ඨාස භාර නිලධාරීන් හා නියෝජ්‍ය පොලිස්පතිවරුන් කටයුතු කරන්නැයි වැඩබලන පොලිස්පති නීතිඥ ප්‍රියන්ත වීරසූරිය මහතා උපදෙස් ලබා දී තිබේ.

විශේෂ දැනුම්දීමක් කරමින් ඔහු කියා සිටියේ, ඒ සඳහා සියලු බුද්ධි අංශ නිලධාරීන්ගේ ද සහය ඊට ලබා ගන්නා ලෙසයි.

දේශබන්දු තෙන්නකෝන් මහතාට සැඟව සිටීමට ආධාර අනුබල දෙන පුද්ගලයින් සම්බන්ධයෙන් ද අවශ්‍ය ක්‍රියාමාර්ග ගන්නා ලෙස එම දැනුම් දීමෙන් වැඩබලන පොලිස්පතිවරයා දැනුම් දෙයි.

මේ අතර දේශබන්දු තෙන්නකෝන් මහතාට අයත් බව කියන අතුරුගිරිය හෝකන්දර ප්‍රදේශයේ නිවසක් ඊයේ පස්වරුවේ අපරාධ පරීක්ෂණ දෙපාර්තමේන්තුවේ නිලධාරීන් විසින් පරීක්ෂාවට ලක් කළේ ය.