වැලිවේරිය සහ අක්මීමන වෙඩි තැබීම්වල සැකකරුවන් සොයන්න පොලිස් කණ්ඩායම් 07ක්...

COLOMBO (News 1st) - වැලිවේරිය හා අක්මීමන වෙඩි තැබීම් සිදු කළ සැකකරුවන් අත්අඩංගුවට ගැනීමට පුළුල් විමර්ශන ආරම්භ කර ඇති බව පොලීසිය පවසයි.

පොලීසිය සඳහන් කළේ, ඒ සඳහා පොලිස් කණ්ඩායම් 07 ක් පත් කර ඇති බවයි.

වැලිවේරිය අරලියගස්දෙක  හන්දිය ප්‍රදේශයේ ඊයේ (13) රාත්‍රි කළ වෙඩි තැබීමකින් පුද්ගලයෙකු තුවාල ලැබුවේය.

පොලීසිය සඳහන් කළේ, වෙඩි වැදීමෙන් තුවාල ලැබූ පුද්ගලයා ගම්පහ රෝහලේ ප්‍රතිකාර ලබන බවයි.

ඔහු මෝටර් රථයකින් ගමන් කරමින් සිටියදී වෙඩි ප්‍රහාරයට ලක්ව තිබේ.

එලෙස තුවාල ලබා ඇත්තේ 26 හැවිරිදි උඩුගම්පොල ප්‍රදේශයේ පදිංචිකරුවෙකි.

සැකකරුවන් අත්අඩංගුවට ගැනීමට පොලිස් කණ්ඩායම් 03ක් යොදවා ඇතැයි පොලිසිය පවසයි.

මේ අතර ගාල්ල අක්මීමන තලගහ ප්‍රදේශයේ වෙඩි තැබිම පිළිබඳ විමර්ශනයට පොලිස් කණ්ඩායම් 04ක් අනියුක්ත කර තිබේ.

ඊයේ(13) පස්වරුවේ කළ මෙම වෙඩි තැබීමෙන්  බූස්ස අධි ආරක්ෂිත බන්ධනාගාරයේ හිටපු සහකාර අධිකාරිවරයෙකු මිය ගියේය.

පොලීසිය සඳහන් කළේ  ඔහු සිය මිදුලේ සිටියදී යතුරුපැදියකින් පැමිණි දෙදෙනෙකු වෙඩි තබා පලාගොස් ඇති බවයි.

සැකකරුවන් පැමිණි බව කියන යතුරු පැදි දෙකක් යක්කලමුල්ල ප්‍රදේශයේ දමා ගොස් තිබියදි සොයා ගත් බව පොලීසිය සඳහන් කළේ ය.

වෙඩි තබා ඇත්තේ මීලිමිටර් 9 වර්ගයේ පිස්තෝලයකිනි.

ඝාතනයට ලක්වු 61 හැවිරිදි  බූස්ස අධි ආරක්ෂිත බන්ධනාගාරයේ හිටපු සහකාර අධිකාරිවරයා පසුගිය වසරේ මාර්තු මාසයේ විශ්‍රාම ගොස් තිබුණේය.