පොලිස් නිලධාරීන්ට පොලිස්පතිගෙන් චක්‍රලේඛයක්...

COLOMBO (News1st)  - පොලිස් ස්ථාන වෙත පැමිණිලි ඉදිරිපත් කිරීමට පැමිණෙන අයගෙන් පැමිණිලි බාර නොගෙන ප්‍රතික්ෂේප කරන නිලධාරීන්ට එරෙහිව විනය ක්‍රියාමාර්ග ගන්නා බව වැඩබලන පොලිස්පති ප්‍රියන්ත වීරසූරිය මහතා පවසයි.

පොලිස් ආඥා පනතේ ප්‍රතිපාදන අනුව පැමිණිලි බාර නොගෙන ප්‍රතික්ෂේප කරන නිලධාරීන්ට එරෙහිව අධිකරණ ක්‍රියාමාර්ග ගැනීමට ද හැකි බව වැඩබලන පොලිස්පතිවරයා චක්‍රලේඛයකින් දන්වා තිබේ.

වැඩබලන පොලිස්පති ප්‍රියත්න වීරසුරීය මහතා පවසන්නේ, මෙලෙස පැමිණිලි ප්‍රතික්ෂේප කරන බවට තමා වෙත ලිඛිතව සහ වාචිකව තොරතුරු ලැබී ඇති බවයි.

ප්‍රතික්ෂේප කිරීමට හේතු ලෙස පොලිස් ස්ථාන භාර නිලධාරීන් සහ සෙසු නිලධරයන් විවිධ කරුණු ඉදිරිපත් කරන බවද සිය චක්‍රලේඛයෙන් වැඩබලන පොලිස්පතිවරයා දැනුම් දී තිබේ.

පොලිස් ස්ථාන වෙත වාර්තා වන පැමිණිලි සටහන් කිරිම සහ විමර්ශනය කිරීම පොලිස් නිලධාරීන්ගේ යුතුකමක් හා වගකීමක් බව ද එහි සඳහන් ය.

මින් ඉදිරියට පොලිස් ස්ථාන වෙත ලැබෙන කිසිඳු පැමිණිල්ලක් බාර නොගෙන ප්‍රතික්ෂේප කළ නොහැකි බව වැඩබලන පොලිස්පතිවරයා අවධාරනය කර තිබේ.