Clean Sri Lanka වැඩසටහනින් මෙරට අපද්‍රව්‍ය කළමනාකරණ පද්ධතියේ ධාරිතාව වැඩි කිරීමට ජපානයෙන් රුපියල් මිලියන 565ක ප්‍රදානයක්...

COLOMBO (News 1st) - Clean Sri Lanka වැඩසටහන යටතේ ශ්‍රී ලංකාවේ අපද්‍රව්‍ය කළමනාකරණ පද්ධතියෙහි ධාරිතාව වැඩි කිරීමට ජපානය විසින් යෙන් මිලියන 300ක් හෙවත් රුපියල් මිලියන 565ක ප්‍රදානයක් ලබා දීමට කටයුතු කර තිබේ.

ඊට අදාළ අවබෝධතා ගිවිසුමට අත්සන් තැබීම අද (03) ජනාධිපති කාර්යාලයේදී සිදුවූයේ ජනාධිපති අනුර කුමාර දිසානායක මහතා ඉදිරියේදීයී.

ජපානයේ විදේශ කටයුතු පිළිබඳ පාර්ලිමේන්තු උප අමාත්‍ය සයමා අකිකෝ මහත්මිය සහ මුදල් අමාත්‍යාංශ ලේකම් මහින්ද සිරිවර්ධන මහතාගේ සහභාගීත්වයෙන් මෙම අවබෝධතා ගිවිසුමට අත්සන් තැබිනි.

මෙම ප්‍රදානය මගින්  පළාත් පාලන ආයතනවල අපද්‍රව්‍ය කළමනාකරණයෙහි ධාරිතාව වැඩිදියුණු කිරීම සඳහා කසල ප්‍රවාහනයට  කම්පැක්ටර් රථ 28ක්  සපයනු ලබන අතර, ඉන් බස්නාහිර පළාතට රථ 14ක්, නැගෙනහිර පළාතට රථ 08ක් සහ උතුරු පළාතට රථ 06ක් බැගින් ලබා දීමට නියමිතයි.

වත්මන් රජය ගෙන යන දූෂණ විරෝධී වැඩපිළිවෙළ නිසා ලෝකයේ රටවල  ආයෝජන  ආකර්ෂණය ශ්‍රී ලංකාව වෙත යොමු වෙමින් තිබෙන බව ජපානයේ විදේශ කටයුතු පිළිබඳ පාර්ලිමේන්තු උප අමාත්‍ය සයමා අකිකෝ මහත්මිය මෙහිදී සඳහන් කර තිබේ.

වත්මන් රජය විසින් ක්‍රියාවට නංවා තිබෙන දූෂණ විරෝධී වැඩපිළිවෙළ කිසිදු අයුරකින් පළුදු නොකර ඉදිරියටත් ක්‍රියාත්මක කරන බව අවධාරණය කළ ජනාධිපතිවරයා ජපාන රජයේ ආධාර ඇතිව මෙරට ආරම්භ කර අතරමග නැවතුණු සංවර්ධන ව්‍යාපෘති නැවත ආරම්භ කිරීම සම්බන්ධයෙන් ජපාන රජය වෙත ස්තුතිය පළ කර තිබේ.