මන්නාරම අධිකරණ විනිසුරුවරයාට අපහාසාත්මක පෝස්ටර් ඇලවීම: හිටපු පාර්ලිමේන්තු මන්ත්‍රී ජේ.ශ්‍රී රංගා අත්අඩංගුවට ගැනීමට විමර්ශන..

COLOMBO (News1st) - මන්නාරම අධිකරණ විනිසුරුවරයාට අපහාසාත්මක පෝස්ටර් ඇලවීම: හිටපු පාර්ලිමේන්තු මන්ත්‍රී ජේ.ශ්‍රී රංගා අත්අඩංගුවට ගැනීමට විමර්ශන..

මන්නාරම මහාධිකරණ විනිසුරුවරයාට අපහාසාත්මක වන ආකාරයේ පෝස්ටර් ඇලවීමේ සිද්ධියට අදාළ ප්‍රධාන සැකකරු ලෙස හඳුනාගෙන සිටින හිටපු පාර්ලිමේන්තු මන්ත්‍රී ජේ.ශ්‍රී. රංගා මහතා අත්අඩංගුවට ගැනීම සඳහා විමර්ශන සිදුකෙරෙමින් පවතින බව කොළඹ අපරාධ කොට්ඨාශය කොළඹ ප්‍රධාන මහෙස්ත්‍රාත් තිළිණ ගමගේ මහතාට අද(21) දැනුම් දී ඇත.

එහිදී විමර්ශන නිලධාරීන් අධිකරණය හමුවේ කරුණු දක්වමින් පැවසුවේ, ප්‍රධාන සැකකරු මේ වනවිට සිය නිවසේ නොමැති බවයි.

ඔහු සොයා විමර්ශන සිදුකරන බව ද විමර්ශන නිලධාරීන් සඳහන් කළේ ය.

මෙම සිද්ධිය සම්බන්ධයෙන් රක්ෂිත බන්ධනාගාරගත කර සිටින සැකකරුවන් කිහිපදෙනෙකු වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න මහතා අධිකරණය හමුවේ කරුණු දක්වමින් සිය සේවාදායකයින් මෙම සිද්ධියේ සාක්ෂිකරුවන් බව කරුණු දක්වමින් සඳහන් කළේ ය.

සාක්ෂිකරුවන් මෙලෙස රක්ෂිත බන්ධනාගාරගත කිරීමට ගියහොත් පොලීසියට නඩුවේ කරුණු තහවුරු කර ගැනීමට නොහැකි තත්ත්වයක් ඇති බව වන බව ද නීතීඥවරයා කරුණු දක්වමින් අවධාරණය කළේ ය.

කෙසේ වෙතත් ඉදිරිපත් වූ කරුණු සලකා බැලූ මහෙස්ත්‍රාත්වරයා සිද්ධිය සම්බන්ධයෙන් රක්ෂිත බන්ධනාගාර ගත කර සිටි සැකකරුවන් අටදෙනා අතරෙන් හතර දෙනකු පමණක් ඇප මත මුදා හැරීමට නියෝග කර ඇත.

සෙසු සැකකරුවන් හතර දෙනා තවදුරටත් නොවැම්බර් මස 04 දක්වා යළි රක්ෂිත බන්ධනාගාරගත කිරීමට ද මහෙස්ත්‍රාත්වරයා නියෝග කර ඇත.