IMF ඉලක්ක සපුරා ගැනීම සහ ජනතාවට ඇති පීඩනය ලිහිල් කිරීම සඳහා වන විකල්ප විසඳුම් වෙනුවෙන් පෙනී සිටිනවා - ජනපති IMF නියෝජිතයින්ට කියයි

COLOMBO ( News 1st ) -  ජාත්‍යන්තර මුල්‍ය අරමුදලේ ඉලක්ක සපුරා ගැනීම සහ ජනතාවට ඇති පීඩනය ලිහිල් කිරීම සඳහා වන විකල්ප විසඳුම් වෙනුවෙන් පෙනී සිටින බව ජනාධිපති අනුර කුමාර දිසානායක මහතා යළි තහවුරු කර තිබේ.

ඒ , දිවයිනට පැමිණ සිටින ජාත්‍යන්තර මූල්‍ය අරමුදලේ(IMF) නියෝජිතයින් සමග අද(03) පස්වරුවේ පැවති සාකච්ඡාවකදී ය.

ජාත්‍යන්තර මූල්‍ය අරමුදලේ ආසියා පැසිෆික් දෙපාර්තමේන්තුවේ අධ්‍යක්ෂ ක්‍රිෂ්ණ ශ්‍රීනිවාසන්, ජ්‍යෙෂ්ඨ දූත මණ්ඩල ප්‍රධානී ආචාර්ය පීටර් බ්‍රෙයර් යන මහත්වරුන් ඇතුළු ජ්‍යෙෂ්ඨ නියෝජිත පිරිසක් මෙම සාකච්ඡාවට එක්ව සිටියහ.

ජනාධිපති මාධ්‍ය අංශය නිවේදනය කළේ, ජාත්‍යන්තර මූල්‍ය අරමුදල සහ ශ්‍රී ලංකාව අතර මේ වනවිට ක්‍රියාත්මක වැඩසටහනේ ප්‍රගතිය පිළිබඳව මෙහිදි සමාලෝචනයට ලක් කළ බවයි.

ඉහළ වැට් බද්ද සහ ආදායම් බදු හේතුවෙන් පීඩාවට පත් ජනතාවට සහන සැලසීමට  රජය සැලසුම් කර  ඇතැයි ජනාධිපතිවරයා එහිදි පෙන්වා දී තිබේ.

ජනාධිපති මාධ්‍ය අංශය නිවේදනය කළේ, ජාත්‍යන්තර මූල්‍ය අරමුදල සමග වන වැඩසටහනේ ඉලක්ක සපුරා ගැනීම වෙනුවෙන් වූ වත්මන් ජනාධිපතිවරයාගේ කැපවීම IMF නියෝජිතයන් අගය කළ බවයි.

ජාත්‍යන්තර මූල්‍ය අරමුදල සහ ශ්‍රී ලංකාව අතර වැඩසටහනේ තුන්වන සමාලෝචනය ආරම්භ කිරීම පිළිබඳව ද දෙපාර්ශ්වයේම අවධානය යොමුව තිබේ.

ඉදිරි මහ මැතිවරණය හේතුවෙන් යම් ප්‍රමාදයන් ඇති විය හැකි නමුත්, බාධාවකින් තොරව එම කටයුතු අඛණ්ඩව ඉදිරියට ගෙන යාමට කටයුතු කරන බව ජනාධිපති අනුර කුමාර දිසානායක මහතා  ජාත්‍යන්තර මූල්‍ය අරමුදල වෙත සහතිකවු බව ජනාධිපති මාධ්‍ය අංශය නිකුත් කළ නිවේදනයේ වැඩිදුරටත් දැක්වෙයි.