ශාසන ඉතිහාසයේ සුවිශේෂී සිදුවීම් රැසක් සිදු වූ බිනර පුන් පොහෝ දිනය අදයි

COLOMBO (News 1st) - ශාසන ඉතිහාසයේ සුවිශේෂී සිදුවීම් රැසක් සිදු වූ බිනර පුන් පොහෝ දිනය අදට යෙදී තිබේ.

බිනර පොහොය උදා වන්නේ වස්සාන කාලයේ වීම ද විශේෂත්වයකි.

බුදුරජාණන් වහන්සේ විශාලා මහනුවර වැඩවසන සමයේ මහා ප්‍රජාපතී ගෝතමිය ඇතුළු 500ක් කුල කාන්තාවන් තෙවන වරටත් පැමිණ පැවිදිවන්නට අවසර ඉල්ලා සිටියේ, අද වැනි  පුර පසලොස්වක දිනකදීයි.

එහිදී ආනන්ද තෙරුන් වහන්සේගේ මැදිහත්වීම මත බුදුරජාණන් වහන්සේ භික්ෂුණීන් පිළිපැදිය යුතු ගරු ධර්ම 8ක් පනවමින් ඊට අවසර ලබා දුන්හ.

වස් වැසීමේ යෙදී සිටින භික්ෂුන් වහන්සේ ආරාමවලින්, ලෙන්වලින්, වනසෙනසුන්වලින් බැහැර නොගොස් ශාසනික, භාෂාමය හා සාහිත්‍යමය වශයෙන් විශාල මෙහෙවරක් මේ කාලසීමාව තුළ සිදු කරනු ලබනු ඇත.

සද්ධර්මරත්නාවලිය, පූජාවලිය, සද්ධර්මාලංකාරය, ජාතක පොත් වහන්සේ වැනි සම්භාව්‍ය ගණයට ගැනෙන ධර්ම ග්‍රන්ථ රැසක්  බිනර මාසයේ ලියවුණ බව ශාසන ඉතිහාසයේ සඳහන් වේ.