BREAKING : ඔස්ට්‍රේලියාවේ රක්ෂිත බන්ධනාගාරගත කර සිටි ධනුෂ්ක ගුණතිලකට ඇප ලැබෙයි

COLOMBO (News 1st) – ලිංගික චෝදනා මත රක්ෂිත බන්ධනාගාරගත කර සිටි ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලක ඔස්ට්‍රේලියානු ඩොලර් 150,000 ක ඇප මත නිදහස් කිරීමට සිඩ්නි අධිකරණය තීරණය කර තිබේ. 

සිඩ්නි අධිකරණය හමුවේ අද නඩුව කැඳවූ අවස්ථාවේදී ධනුෂ්ක  ගුණතිලක මහතා වෙනුවෙන් පෙනී සිටි මුරුගන් තංගරාජ් මහතා පෙන්වා දුන්නේ ඉදිරිපත්ව ඇති කරුණු අනුව ගොනුකළ චෝදනා තුළ ශක්තිමත් නඩු නිමිත්තක් නොමැති බවයි.

ශ්‍රී ලංකා ක්‍රිකට් සහා ශ්‍රී ලංකා රජය තම සේවා දායකයාට සහය දක්වන බවත් , ඔහුට ඇප ලබා නොදුනහොත් ඔහුගේ ක්‍රීඩා ජිවිතය අවසන් වනු ඇති බවත් නිතීඥවරයා පෙන්වා දී තිබේ. 

කරුණු සලකා බැලූ මහේස්ත්‍රාත්වරයා ඔස්ට්‍රේලියානු ඩොලර් 150000 ක ඇපයක් මත ධනුෂ්ක ගුණතිලක මහතා නිදහස් කළේ ය.

ඇප මත මුදාහැරි ධනුෂ්ක ගුණතිලක මහතා සෑම දිනකම පොලිසියට වාර්තා කළ යුතු අතර සෑම දිනකම රාත්‍රී 9 සිට පසුදා උදෑසන 6 දක්වා ඔහුට සංචරණ සීමා පනවා තිබේ. 

පැමිණිලිකාර පාර්ශවය සමග සබඳතා පැවැත්වීමත් , මුණගෑසීම් සම්බන්ධ ඇප් භාවිතයත් ධනුෂ්ක ගුණතිලකට තහනම් කර තිබේ. 

ධනුෂ්ක  ගුණතිලක අද උසාවිය හමසුවේ පෙනී සිටියේ ඔන්ලයින් තාක්ෂණය ඔස්සෙයි.