සනත්ගේ පෙරළිකාර පන්දු යැවීමෙන් එංගලන්ත ලෙජන්ඩ්ස්ට එරෙහිව ශ්‍රී ලංකා ලෙජන්ඩ්ස්ට විශිෂ්ට ජයක්..

COLOMBO (News 1st): රෝඩ් සේෆ්ටි ලෝක ශූරතා ක්‍රිකට් තරගාවලියේ එංගලන්ත ලෙජන්ඩ්ස් කණ්ඩායමට එරෙහි තරගයෙන් ශ්‍රී ලංකා ලෙජන්ඩ්ස් කණ්ඩායමට කඩුලු 07ක විශිෂ්ට ජයක් හිමිවිය.

මෙම තරගාවලිය ඉන්දියාවේදී පැවැත්වේ. 

තරගයේ ප්‍රථමයෙන් පන්දුවට පහර දුන් එංගලන්ත ලෙජන්ඩ්ස් කණ්ඩායමට පන්දුවාර 19ක් අවසානයේදී සියලු දෙනා දැවී ලබාගත හැකිවූයේ ලකුණු 78 ක් පමණි. 

විශිෂ්ට පන්දුයැවීමක නිරත වූ සනත් ජයසූරිය පන්දුවාර 4කදී ලකුණු 3කට කඩුලු 4ක් දවා ගැනීමට සමත් විය.

ඊට නිලකුණු පන්දුවාර 2ක්ද ඇතුලත් වීම විශේෂත්වයකි. 

නුවන් කුලසේකර සහ චතුරංග ද සිල්වා කඩුලු දෙක බැගින් ⁣දවා ගත්තේය.

පිළිතුරු ඉනිම ක්‍රීඩා කළ ශ්‍රී ලංකා ලෙජන්ඩ්ස් පිල පන්දුවාර 14යි පන්දු 3ක් අවසානයේදී කඩුලු 3ක් පමණක් දැවී තිබියදී ජයග්‍රාහී ඉලක්කය පසු කළේය. 

සනත් ජයසූරියට තරගයේ වීරයා සම්මානය හිමිවිය.