රුවන්පුර අධිවේගයේ ඉදිකිරීම් ඇණහිටී: පවරාගත් ඉඩම් සඳහා වන්දි නොලැබීමෙන් ජනතාවට දුෂ්කරතා..

COLOMBO (News 1st) - රුවන්පුර අධිවේගී මාර්ගයේ ඉදිකිරීම් ඇණහිටීමෙන් ඒ සඳහා ඉඩම් පවරා ගත් බොහෝ පිරිසක් දැඩි පීඩාවට පත්ව සිටී.

රුවන්පුර අධිවේගී මාර්ග ව්‍යාපෘතියෙන් අවතැන්වූවන්ගේ සංගමයේ කාරක සභික කුමේෂ් බිම්සර අල්විස් මහතා සඳහන් කළේ, අධිවේගී මාර්ගයට පවරා ගන්නා බව පැවසූ තම ඉඩම් සඳහා මෙතෙක් වන්දි ලබා දී ‍නොමැති බවයි.

ඇතැම් පුද්ගලයින් මේ වනවිට කුලී නිවාසවල පදිංචි වී සිටින බව ද ‍ඔහු සඳහන් කළේ ය.

කුමේෂ් බිම්සර අල්විස් මහතා පැවසුවේ, පසුගිය මැයි මාසයෙන් පසු රුවන්පුර අධිවේගි මාර්ග‍යේ ඉදිකිරීම් නවතා දමා ඇති බවයි.

මේ පිළිබඳව මාර්ග සංවර්ධන අධිකාරියේ රුවන්පුර අධිවේගි මාර්ග ව්‍යාපෘති‍යේ අධ්‍යක්ෂ එච්. බී. එම් ප්‍රේමකාන්ති මහත්මියගෙන් නිව්ස්ෆස්ට් විමසිමක් කළේ ය.‍

ඇය පැවසුවේ, අධිවේගී මාර්ගයට පවරා ගත් ඉඩම් සඳහා වන්දි ලබාදීමේ ගැටලුවක් මතුව ඇති බවයි.

ව්‍යාපෘතිය සඳහා රාජ්‍ය බැංකුවකින් ලබා ගත් රුපියල් බිලියන 12.9 ණය මුදලේ වාරික මුදා නොහැරීම මෙම තත්ත්වයට හේතු වී ති‍බේ.

ඒ අනුව කොන්ත්‍රාත් සමාගම ඉදිකිරිම්වලින් ඉවත්ව ඇතැයි ඇය ප්‍රකාශ කළා ය.

ව්‍යාපෘති‍යේ අධ්‍යක්ෂවරිය පැවසුවේ, පවරාගත් ඉඩම් සඳහා වන්දි ගෙවීමට රුපියල් බිලියන ‍2.6 ක් මහා භාණ්ඩාගාරයෙන් ඉල්ලා ඇති බවයි.

එය ලැබුණු වහා වන්දි ලබාදීමට පියවර ගන්නා බව රුවන්පුර අධිවේගි මාර්ග ව්‍යාපෘති‍යේ අධ්‍යක්ෂ එච්. බී. එම්. ප්‍රේමකාන්ති මහත්මිය වැඩිදුරටත් ප්‍රකාශ කළා ය.