LPL විදෙස් ක්‍රීඩක ලියාපදිංචිය ඇරඹේ..

COLOMBO (News 1st) - 2021 LPL පන්දුවාර 20යි 20 ක්‍රිකට් තරගාවලියේ විදෙස් ක්‍රීඩක ලියාපදිංචිය අද(21) සිට ඇරඹෙන බවට ශ්‍රී ලංකා ක්‍රිකට් ආයතනය නිවේදනය කරයි.

ශ්‍රී ලංකා ක්‍රිකට් ආයතනය නිකුත් කළ නිවේදනයේ දැක්වෙන්නේ, තරගාවලියට නියෝජනය කිරීමට අපේක්ෂා කරන ක්‍රීඩකයින්ට තම ආයතන නිල වෙබ් අඩවියට පිවිස ලියාපදිංචි විය හැකි බවයි. ජූනි 27 වැනි දා දහවල් 12.00 දක්වා එලෙස ලියාපදිංචි වීමේ අවස්ථාව ක්‍රීඩකයින්ට හිමිව තිබේ. ලියාපදිංචියෙන් අනතුරුව විදේශීය ක්‍රීඩකයින් තේරීම වෙනුවෙන් කටයුතු සිදු කිරීමට නියමිතය. ජාතික කණ්ඩායම, සංවර්ධන කණ්ඩායම, ඒ කණ්ඩායම සහ මෙරට ප්‍රධානම තරගාවලි නියෝජනය කරන ක්‍රීඩකයින් අතරින් ජාතික ක්‍රිකට් තේරීම් කමිටුව නිර්දේශ කරන දේශීය ක්‍රීඩකයින් මෙවර එල්.පී.එල් 20/20 ක්‍රිකට් තරගාවලියට සුදුසුකම් ලබන බවට ශ්‍රී ලංකා ක්‍රිකට් ආයතනය පවසයි. ඊට තෝරා ගැනෙණ විදෙස් ක්‍රීඩකයින් ජාතික කණ්ඩායම්, පළමු පෙළ ක්‍රිකට් තරග හෝ පූර්ණ සාමාජික මණ්ඩල රටවල පන්දුවාර 20යි 20 තරගවලට එක් වූ අය විය යුතු බවට ශ්‍රී ලංකා ක්‍රිකට් ආයතන නිවේදනයේ සඳහන් ය. කණ්ඩායම් 5ක් මෙවර LPL තරගාවලියට එක්වන අතර එක් කණ්ඩායමකට දේශීය ක්‍රීඩකයින් 14ක් සහ විදෙස් ක්‍රීඩකයින් 6ක් යොදා ගැනීමට අවස්ථාව හිමිවේ.