කොළඹ වරායෙන් පිටත නැවේ ගින්න නිවේ

COLOMBO(News 1st) : කොළඹ වරායෙන් පිටත නැංගුරම්ලා තිබූ නෞකාවක හටගත් ගින්න මේ වනවිට පාලනය කර ඇති බව නාවික හමුදාව පවසයි.

එම ගින්න හටගෙන ඇත්තේ X-PRESS PEARL නමැති භාණ්ඩ ප්‍රවාහන නෞකාවේයි. කොළඹ වරායට වයඹ දෙසින් නාවික සැතපුම් 9 . 5 ක් දුර මුහුදේ එම නෞකාව මේ වනවිට නැංගුරම්ලා ඇති බව නාවික හමුදාව ප්‍රකාශ කළේ ය. නාවික හමුදා මාධ්‍ය ප්‍රකාශක කැප්ටන් ඉන්දික ද සිල්වා මහතා ප්‍රකාශ කළේ, එම නෞකාවේ රසායනික ද්‍රව්‍ය ප්‍රවාහනය කරමින් තිබියදී මෙම ගින්න හටගෙන ඇති බවයි. ඉන්දියාවේ හසීරා වරායේ සිට පැමිණි සිංගප්පූරුවේ ලියාපදිංචි මෙම නෞකාවේ නයිට්‍රික් ඇසිඩ් ටොන් 25 ක් සමග වෙනත් රසායනික ද්‍රව්‍ය සහ රූපලාවන්‍ය ආලේපන ද්‍රව්‍ය සහිත බහාලුම් 1486 ක් රැගෙන විත් ඇති බව ද නාවික හමුදාව ප්‍රකාශ කළේ ය. අදාළ නෞකාවේ සිටින කාර්ය මණ්ඩල සාමාජිකයින් සංඛ්‍යාව 25 කි.