2020 ෆෝර්මියුලා - 1 ලෝක ශූරතාවලියේ පළමු අදියර අවලංගු කෙරේ

News 1st - 2020 ෆෝර්මියුලා වන් ලෝක ශූරතාවලියේ පළමු අදියර අවලංගු කර තිබේ.

ඒ, කොරෝනා වෛරසය හේතුවෙනි. මෙම අදියර ඔස්ට්‍රේලියාවේදී පැවැත්වීමට නියමිතව තිබුණි. මෙවර ෆෝර්මියුලා වන් ලෝක ශූරතාවලියේ සමාරම්භක අදියර ඔස්ට්‍රේලියාවේ මෙල්බන්හිදී ලබන ඉරිදා පැවැත්වීමට නියමිතව තිබුණි. පසුගිය දින සති කිහිපය තුළදී තරගාවලියට එක්වන කණ්ඩායම් පුහුණුවීම් සිදු කළේ එම තරගය වෙනුවෙන්ය. එහි පුහුණු තරග අද පැවැත්වීමට නියමිතව තිබූ අතර කාල ගණන තරග පැවත්වීමට සැලසුම් කර තිබුණේ හෙට දිනයේදීය. කෙසේ නමුත්, එම අදියර අවලංගු කිරීමට සිදු වූයේ සත්කාරක ඔස්ට්‍රේලියාව තුළ ද මේ වනවිට කොරෝනා ආසාදිතයන් වාර්තා වී තිබීම හේතුවෙනි. මෙම ඔස්ට්‍රේලියා ෆෝර්මියුලා වන් ධාවන තරගයට එක්වන කණ්ඩායමක සාමාජිකයෙකු ද කොරෝනා ආසාදිතයෙක් බවට තහවුරු වී ඇත. මෙවර ෆෝර්මියුලා වන් ලෝක ශූරතාවලියේ චීන අදියර ලබන මාසයේදී ෂැංහයිහිදී පැවැත්වීමට නියමිතව තිබූ නමුත් එය කල් දැමූයේ ද මෙම කොරෝනා වෛරසය තත්ත්වය හේතුවෙනි.