වැලි ජාවාරම මැඩලීමේ මෙහෙයුම් දැඩි වෙයි

COLOMBO (News 1st) : වැලි ජාවාරම මැඩලීමේ මෙහෙයුම් දැඩි කිරීමට නාවික හමුදාව පියවර ගෙන තිබේ. නාවික හමුදා ප්‍රකා‍ශක, ලුතිනන් කමාන්ඩර් ඉසුරු සූරියබණ්ඩාර මහතා සඳහන් කළේ, එම මෙහෙයුම් සඳහා නාවික හමුදාවේ මැරින් බලකායේ නිලධාරීන් අනියුක්ත කිරීමට පියවර ගෙන ඇති බවයි. පසුගිය දා ජනා‍ධිපතිවරගේ ප්‍රධානත්වයෙන් ,පතල් හා භූ විද්‍යා සමික්ෂණ දෙපාර්තමෙන්තු නිළධාරීන් සහ නාවික හමුදා ප්‍රධානීන්ගේ සහභාගීත්වයෙන් පැවති සාකච්ඡාවකදී මෙම තීරණයට එළඹ තිබේ. නාවික හමුදා ප්‍රකාශකවරයා සඳහන් කළේ, මහවැලි ගඟ ආශ්‍රිතව වැලි ජාවාරම් ඉහළ ගොස් ඇති බැවින් ඒ ආශ්‍රිතව වැඩි අවධානයක් යොමු කරන බවයි. මේ සම්බන්ධයෙන් යම් තොරතුරක් වේ නම් 0112 21 22 30 හෝ 0112 21 22 31 යන දුරකථන අංක වෙත දැනුම් දිය හැකි බව නාවික හමුදා ප්‍රකාශක ලුතිනන් කමාන්ඩර් ඉසුරු සුරියබණ්ඩාර මහතා සඳහන් කළේ ය. මේ අතර වසරේ ගතවූ දින කිහිපය තුළ පමණක් අනවසර වැලි ජාවාරම්කරුවන් 17 දෙනකු අත්අඩංගුවට ගැනීමට නාවික හමුදාව සමත් වී තිබේ.