ආසියානු කුසලානය: ශ්‍රී ලංකාවට එරෙහිව බංග්ලාදේශයට විශිෂ්ට ජයක්

COLOMBO (News 1st) - ආසියානු කුසලානයේ ශ්‍රී ලංකාව සහ බංග්ලාදේශය අතර පැවති ක්‍රිකට් තරගයෙන් බංග්ලාදේශය ලකුණු 137ක ජයක් වාර්තා කළේ ය. තරගයේ කාසියේ වාසිය හිමි කර ගත් බංග්ලාදේශය ප්‍රථමයෙන් පන්දුවට පහර දීමට තීරණය කළේ ය. ඒ අනුව පිටියට පිවිසි ලිටෝන් ඩෑස්ට හා ශකීබ් අල් හසන්ට ලසිත් මාලිංගගේ පන්දු හමුවේ ලකුණු නොලබා ආපසු ක්‍රීඩාගාරයට යෑමට සිදු විය. මුෂ්ෆිකො රහීම් ලකුණු 144ක් සහ මොහොමඩ් මිතුන් ලකුණු 63ක් රැස් කළහ. බංග්ලාදේශය පන්දුවාර 49යි පන්දු 3කදී සියලු කඩුලු දැවී රැස් කළ ලකුණු සංඛ්‍යාව 261කි. පන්දු යැවීමේදී ලසිත් මාලිංග කඩුලු 4ක් දවා ගත් අතර ධනංජය ද සිල්වා කඩුලු 2ක් දවා ගත්තේ ය. ඒ අනුව ලකුණු 262ක ඉලක්කයක් කරා පිටියට පිවිසි ශ්‍රී ලංකා කණ්ඩායමට රැස් කර ගත හැකි වූයේ ලකුණු 124ක් පමණි. දිල්රුවන් පෙරේරා ලකුණු 29ක් හා උපුල් තරංග ලකුණු 27ක් රැස් කළහ. දක්ෂ පන්දු යැවීමක නිරත වූ බංග්ලාදේශයේ මෂ්රාෆ් මොටාසා, මුස්තෆිසෝ රහ්මන් හා මෙහිඩි හසන් අතර කඩුලු 2 බැගින් බෙදී ගියහ.