News1st මාධ්‍යවේදී මොහොමඩ් ඉෆාම් අභාවප්‍රාප්තවෙයි

News1st වාර්තාකරු මාධ්‍යවේදී මොහොමඩ් ඉෆාම් අභාවප්‍රාප්ත වෙයි...

by Staff writer 16-11-2026 | 11:07 AM

COLOMBO (News 1st) - දුරබැහැර ජනතාව සමග ජීවිත් වී , ඔවුන්ගේ දුක්ඛ දෝමනස්සයන්, අගනුවර ප්‍රවෘත්ති කාමරයේ සහෘදයින් වෙත යොමු කරමින්, තොරතුරු අයිතිය වෙනුවෙන් අනභිභවනීය මෙහෙවරක නිරත වූ, අපේ කාලයේ සොඳුරු සන්නිවේදකයෙකු අද (16) පෙරවරුවේ අපට අහිමි විය.

ඔහු ඉෆාම්. අපේ අනුරාධපුර වාර්තාකරු.

දිවියෙන් සමුගන්නා විට වයස අවුරුදු 45ක්.

අබ්දුල් හමීඩ් මොහොමඩ් ඉෆාම් , 1982 වසරේ පෙබරවාරි 25 වැනිදා උපත ලැබුවේ නොච්චියාගමදීයි.

ඔහු අකුරු කළේ, නොච්චියාගම අල් හික්මා මහා විද්‍යාලයෙන් සහ අනුරාධපුර සහිරා විද්‍යාලයෙන්.

අනුරාධපුර News1st ප්‍රාදේශීය වාර්තාකරුවෙකු ලෙස විශිෂ්ට සේවාවක් ඉටු කරමින් සිටි ඉෆාම්, වැව් බැදි රාජ්‍යයේ ආදරණීය ජනතාවගේ සමීප මිතුරෙකු වී රාජකාරිය ඉහළින්ම ඉටු කළ අයෙකි.

වසර 14කට අධික කාලයක් ඔහු News1st ප්‍රාදේශීය වාර්තාකරුවෙකු ලෙස කටයුතු කළේ ය.

ප්‍රවෘත්ති වාර්තාකරණයට පමණක් සීමා නොවූ ඉෆාම් News1st ඇතුළු සිරස මාධ්‍ය ජාලයේ විවිධාකාර මහජන සේවා ක්‍රියාන්විතවලට පූර්ණ දායකත්වය ලබා දුන්නේ ය.

ගම්මැද්ද ඉන් ප්‍රමුඛයි.

ගම් දනව් සිසාරා විහිද ගිය ගම්මැද්ද ක්‍රියාන්විතයේ ආරම්භයේ සිටම කැමරාව අත දරා මංමාවත් දිගේ ඇවිද ගොස්, ජනතා ගැටලු විසඳන්නට සක්‍රියව දායක වෙමින් ඔහු ඉටු කළ සේවය කිසිවෙකුට අමතක නොවනු ඇත.

ආදරණීය සහෘදය ඔබ, රජරටින් මුළු රට එළිය කළ අගනා, වටිනා මිනිසෙක්. ඔබට සුබ ගමන්..!