ඩොලර් නෝට්ටු ඉතිහාසයේ වසර 165ක සම්ප්‍රදායක් නිමා වෙයි: ජනපති ට්‍රම්ප්ගේ අත්සන ඩොලර් නෝට්ටුවලට

by Janitha Mendis 28-03-2026 | 11:02 AM

COLOMBO (News1st): ඇමරිකානු එක්සත් ජනපද ඩොලර් නෝට්ටු ඉතිහාසයේ වසර 165ක් පුරා පැවත ආ සම්ප්‍රදායක් නිමා කරමින්, එරට වත්මන් ජනපති ඩොනල්ඩ් ට්‍රම්ප් මහතාගේ අත්සන නව ඩොලර් නෝට්ටු සඳහා ඇතුළත් කිරීමට ඇමරිකානු භාණ්ඩාගාර දෙපාර්තමේන්තුව තීරණය කර තිබේ.

බලයේ සිටින ඇමරිකානු ජනාධිපතිවරයෙකුගේ අත්සන එරට මුදල් නෝට්ටුවක සටහන් වන ප්‍රථම අවස්ථාව මෙය ලෙස ඉතිහාසයට එක්වනු ඇත. 1861 වසරේ සිට ඇමරිකානු ඩොලර් නෝට්ටුවල අත්සන් තැබීම සිදු කරනු ලැබුවේ භාණ්ඩාගාර ලේකම්වරයා (Treasury Secretary) සහ භාණ්ඩාගාරිකවරයා (Treasurer) විසින් පමණි. කෙසේ වෙතත්, නව තීරණයට අනුව භාණ්ඩාගාරිකවරයාගේ අත්සන ඉවත් කර, ඒ වෙනුවට ජනාධිපතිවරයාගේ අත්සන යොදා නෝට්ටු මුද්‍රණය කෙරෙනු ඇත.

ඇමරිකානු එක්සත් ජනපදයේ 250වන නිදහස් සංවත්සරය (Semiquincentennial) 2026 වසරේ ජූලි මාසයට යෙදී තිබේ. එම සුවිශේෂී සැමරුම නිමිත්තෙන් මෙම ඓතිහාසික වෙනස සිදු කරන බව ඇමරිකානු භාණ්ඩාගාර දෙපාර්තමේන්තුව නිල වශයෙන් නිවේදනය කළේය.
ඒ අනුව, ජනාධිපති ඩොනල්ඩ් ට්‍රම්ප් සහ භාණ්ඩාගාර ලේකම් ස්කොට් බෙස්න්ට්ගේ (Scott Bessent) අත්සන් සහිත ප්‍රථම ඩොලර් 100 නෝට්ටු කාණ්ඩය එළඹෙන ජූනි මාසයේදී මුද්‍රණය කිරීමට නියමිතව ඇත.

මෙම පියවර මගින් ඇමරිකානු මූල්‍ය පද්ධතිය තුළ ජනාධිපතිවරයාගේ විධායක බලය සංකේතාත්මකව ඉස්මතු කෙරෙනු ඇති බව දේශපාලන විචාරකයෝ පවසති.