පෞද්ගලික මන්ත්‍රී යෝජනා 6ක් පාර්ලිමේන්තුවේදී අද විවාදයට ගැනෙයි..

COLOMBO (News1st)-පෞද්ගලික මන්ත්‍රී යෝජනා 6ක් පාර්ලිමේන්තුවේදී අද විවාදයට ගැනෙනවා.

ඒ අනුව ශ්‍රී ලංකා පාර්ලිමේන්තුවේ නියෝජිතයින්, හිටපු  රාජ්‍ය නායකයින් හා එම වැන්දඹුවන් භූක්ති විඳින වරප්‍රසාද සුදුසු පරිදි කප්පාදු කිරීමට අදාළ යෝජනාවක් පාර්ලිමේන්තු මන්ත්‍රි හේෂා විතානගේ මහතා විසින් ඉදිරිපත් කරනු ඇති.

පාර්ලිමේන්තු මන්ත්‍රී රෝහණ බණ්ඩාර  මහතා විසින් අත්‍යවශ්‍ය ආහාර ද්‍රව්‍ය ආනයනය කිරීම හා බෙදා හැරීම සඳහා රාජ්‍ය අංශයේ මැදිහත්වීම ඉහළ නැංවීමේ වැඩසටහනක් සකස් කිරීමේ යෝජනාව ‍ඉදිරිපත් කිරීමට නියමිතයි.

පොදු ප්‍රවාහනයේදී ප්‍රමිතීන්ට අනුකූල බස් රථ පමණක් මෙරටට ගෙන්වීමට අදාළ නීති සකස් කිරීම පිළිබඳ යෝජනාවක් පාර්ලිමේන්තු මන්ත්‍රී රවීන්ද්‍ර බණ්ඩාර අද ඉදිරිපත් කරයි.

පාර්ලිමේන්තු මන්ත්‍රී ලාල් ප්‍රේමනාත් මහතා විසින් සංවර්ධන යෝජනා නමින් මෙරට තුළ මේ දක්වා ඉදිකර ඇති එහෙත් කිසිදු ප්‍රයෝජනයකට නොගන්නා සියලුම ගොඩනැගිලි මහජන ප්‍රයෝජනය සඳහා යොදා ගැනීමට අදාළ යෝජනාව පාර්ලිමේන්තුවට ඉදිරිපත් කරයි.

විගණන වාර්තා මගින් ලබා දෙන නිර්දේශ ක්‍රියාත්මක කිරීම සඳහා වැඩසටහනක් සකස් කිරීම සඳහා වූ යෝජනාව ගෙන එන්නේ පාර්ලිමේන්තු මන්ත්‍රි චමින්ද විජේසිරි මහතා විසින් ය.

පාර්ලිමේන්තු මන්ත්‍රී රවී කරුණානායක මහතා ඉදිරිපත් කිරීමට නියමිතව ඇත්තේ ශ්‍රී ලංකාවේ සෑම පවුලකටම ජීවත් වීමට නිවසක් ලබා දීමට අදාළ යෝජනාවකි.