සිරස ප්‍රවෘත්ති අංශයට උරදී ක්‍රියාකළ ජ්‍යෙෂ්ඨ මාධ්‍යවේදී ප්‍රේමලාල් විජේරත්න අභාවප්‍රාප්ත වෙයි...

COLOMBO (News 1st) - දශක 5කට අධික කාලයක් පුරා මාධ්‍යවේදියකු, ප්‍රවෘත්ති කර්තෘවරයකු, නියෝජ්‍ය කර්තෘවරයෙකු වශයෙන් කටයුතු කළ ජ්‍යෙෂ්ඨ මාධ්‍යවේදී ප්‍රේමලාල් විජේරත්න මහතා අභාවප්‍රාප්ත වී තිබේ.

මියයන විට ඔහු 75 වැනි වියේ පසුවිය.

ප්‍රේමලාල් විජේරත්න මහතා මාධ්‍යවේදී වෘත්තියට අත්පොත් තැබුවේ  ‘දවස’ පුවත්පතෙන් සිය මාධ්‍ය කටයුතු ආරම්භ කරමිනි.

පසුව ඉරිදා පෙරමුණ, මව්බිම, ජනයුගය මෙන්ම සන්ඩේ ලීඩර්  පුවත්පත්වල ද සේවය කළ ප්‍රේමලාල් මහතා පොලිස්, සෞඛ්‍ය මෙන්ම දේශපාලන ක්ෂේත්‍ර ආවරණය කළ මාධ්‍යවේදියෙකු ලෙස කටයුතු කළේ ය.

සිරස මාධ්‍ය ජාලයේ ගුවන් විදුලි අංශයේද දශකයකට අධික කාලයක් සේවය කළ ඒ මහතා සිරස ප්‍රවෘත්ති අංශය ගොඩනගන යුගයේ ඊට උරදී ක්‍රියා කළේ ය.

මියයන විට ඔහු රාජකාරී කරමින් සිටියේ ‘මව්රට’ පුවත්පතේ නියෝජ්‍ය කර්තෘවරයා වශයෙනි

ප්‍රේමලාල් විජයරත්න මහතා - දෙදරු පියෙක්.

දේහය අද (17) රාත්‍රියේ සිට මහජන ගෞරවය සඳහා අංක -240, වෙන්නවත්තපාර, වැල්ලම්පිටිය නිවසේ තැන්පත් කර තැබේ.

දේහය පිළිබද අවසන් කටයුතු  සෙනසුරාදා පස්වරු 04ට කොටිකාවත්ත පොදු සුසාන භුමියේදී සිදුකිරීමට නියමිතයි.