ට්‍රම්ප්ගේ තීරු බදු ගැන අධ්‍යනය කරන්න, ජනපතිගෙන් කොමිසමක්...

COLOMBO (News 1st) - එක්සත් ජනපදය විසින් පැනවූ නව තීරු බදු සම්බන්ධයෙන් රජයට නිර්දේශ ඉදිරිපත් කිරීම සඳහා කමිටුවක් පත් කර තිබේ.

ඒ ජනාධිපති අනුර කුමාර දිසානායක මහතා විසිනි.

ජනාධිපති මාධ්‍ය අංශය සඳහන් කරන්නේ,එක්සත් ජනපද ජනාධිපති ඩොනල්ඩ් ට්‍රම්ප් විසින් පනවන ලද නව තීරු බදු සහ ඇතිවිය හැකි ගැටලු  සම්බන්ධයෙන් ගැඹුරින් අධ්‍යනය කර රජයට නිර්දේශ ඉදිරිපත් කිරීම මෙම පත්කිරීමේ අරමුණ වී ඇති බවයි.

ඒ අනුව මුදල් අමාත්‍යාංශයේ ලේකම්, මහ බැංකු අධිපති, ශ්‍රී ලංකා ආයෝජන මණ්ඩලයේ සභාපති, ශ්‍රී ලංකා අපනයන සංවර්ධන මණ්ඩලයේ සභාපති, විදේශ අමාත්‍යාංශයේ ආර්ථික කටයුතු පිළිබඳ අධ්‍යක්ෂ ජනරාල් යන නිලධාරීන් ද, ජනාධිපති ජ්‍යෙෂ්ඨ ආර්ථික උපදේශක දුමින්ද හුලංගමුව , ශ්‍රී ලංකා වාණිජ මණ්ඩලයේ ප්‍රධාන ආර්ථික ප්‍රතිපත්ති උපදේශක ශිරාන් ප්‍රනාන්දු සහ අෂ්රොෆ් ඔමාර්, ෂෙරාඩ් අමලීන්, සයිෆ් ජැෆර්ජී යන මහත්වරුන්ද මෙම කමිටුව සඳහා පත් කරනු ලැබ තිබේ.