ලෝක කාන්තා දිනය වෙනුවෙන් ජනපතිගෙන් සුබ පැතුම්...!

COLOMBO (News 1st) - දැයේ දියණිවරුන්ට සුරක්ෂිත ජීවිතයක් හා ශිෂ්ටසම්පන්න සමාජයක් ගොඩනැගීම උදෙසා අප රට නව පුනරුදයක් කරා ගෙන යන ගමනට එක්වන්නැයි, සමස්ත කාන්තා පරපුරට ආරාධනා කරන බව ජනාධිපති අනුර කුමාර දිසානායක මහතා පවසයි.

ජනාධිපතිවරයා ඒ බව පැවසුවේ ජාත්‍යන්තර කාන්තා දිනය වෙනුවෙන් සුබපැතුම් පණිවුඩයක් නිකුත් කරමිනි.

ආණ්ඩුවේ ආර්ථික ප්‍රතිපත්තිය වූ නිෂ්පාදන ආර්ථික ක්‍රියාවලියට මෙරට ජනගහනයෙන් 51.7%ක් වන කාන්තාවන් සක්‍රීයව හා ඵලදායීව සහභාගි කර ගැනීමේ සැලසුම් ක්‍රියාවට නංවා ඇතැයි ජනාධිපතිවරයා පවසයි.

අදාළ නිවේදනයේ  දැක්වෙන්නේ නිවස, වැඩබිම දේශපාලනය ආදී සෑම ස්ථානයකම කාන්තාවට සිදුවන සියලුම ආකාරයේ හිංසනයන්ට, වෙනස්කර සැලකීමට එරෙහිව කටයුතු කරමින් කාන්තා අයිතිවාසිකම් සුරක්ෂිත කර ප්‍රවර්ධනය කිරීමට අත්‍යාවශ්‍ය ව්‍යුහාත්මක වෙනස්කම් සිදු කිරීමට රජයක් ලෙස ප්‍රමුඛත්වය දී ඇති බවයි.