ජනපති සහ නීතිපති අතර හමුවක්!

COLOMBO (News 1st) - නීතිපති පාරින්ද රණසිංහ මහතා, අද (06) පස්වරුවේ ජනාධිපති අනුර කුමාර දිසානායක මහතා හමුවිය.

මාධ්‍යවේදී ලසන්ත වික්‍රමතුංග මහතාගේ ඝාතනයට අදාළ නඩුවේ චූදිතයින් තිදෙනෙකු සම්බන්ධයෙන් නීතිපතිවරයා අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට යැවූ නිර්දේශයක් පිළිබඳව, මේ වන විට විවාදාත්මක තත්ත්වයක් නිර්මාණය වී තිබේ.

නීතිපතිවරයාගේ නිර්දේශයේ දැක්වුණේ, නඩුවට අදාළව චූදිතයින් ලෙස නම්කර සිටි ප්‍රේම් ආනන්ද උදලාගම, දොන් තිස්සසිරි සුගතපාල සහ ප්‍රසන්න නානායක්කර යන තිදෙනාට විරුද්ධව තවදුරටත් නීති මගින් කටයුතු කිරීමට අදහස් නොකරන බවයි.

ඒ සම්බන්ධයෙන් ඇතිවූ විවාදාත්මක තත්ත්වයත් සමග නීතිපතිවරයා අද පස්වරුවේ ජනාධිපතිවරයා හමුවී සාකච්ඡා කළේ ය.

පස්වරු 2 ට පමණ ජනාධිපති කාර්යාලයට පැමිණි නීතිපතිවරයා ඉන් පිටව ගියේ, පස්වරු 5 ට පමණයි.