ගාල්ලේ නිවසක තිබී සොයා ගත් මත්ද්‍රව්‍ය ප්‍රවාහනය කළ වෑන් රථය සමග දෙදෙනෙකු අත්අඩංගුවට

COLOMBO (News 1st) –ගාල්ල, නාගොඩ ප්‍රදේශයේ නිවසක තිබී සොයා ගත් මත්ද්‍රව්‍ය තොගය ප්‍රවාහනය කළ වෑන් රථය සමග තවත් පුද්ගලයින් දෙදෙනෙකු අත්අඩංගුවට ගෙන තිබේ.

පොලිසිය සඳහන් කළේ, සොයා ගන්නා ලද මත්ද්‍රව්‍ය තොගය ගන්දර, නූන්වැල්ල ධීවර වරායේ සිට  පසුගිය 18 වෙනිදා ගාල්ල නාගොඩ නිවසට රැගෙන විත් ඇත්තේ එම සැකකරුවන් බවයි.

අත්අඩංගුවට ගෙන ඇත්තේ, වෑන් රථයේ රියැදුරු සහ මත්ද්‍රව්‍ය ප්‍රවාහනය කළ තවත් පුද්ගලයෙකි.

රුපියල් කෝටි 500ක් වටිනා මත්ද්‍රව්‍ය තොගය ගාල්ල නාගොඩ ප්‍රදේශයේ නිවසක තිබි ඊයේ සොයා ගත්තේ ය.

ඒ  , මාතර කොට්ඨාස අපරාධ විමර්ශන ඒකකය කළ වැටලීමකදී ය.

අයිස් කිලෝග්‍රෑම් ‍160 ක් සහ හෙරොයින් කිලෝග්‍රෑම් 60 ක් සොයා ගත් මත්ද්‍රව්‍ය අතර වෙයි.

සිද්ධිය සම්බන්ධයෙන් මේ වනවිට පුද්ගලයින් 12 දෙනෙකු අත්අඩංගුවට ගෙන ඇති බව පොලිසිය සඳහන් කළේ ය.